PEM

Lor santie
Li ramas enn rasinn
Li ale
So bann kamarad ti’nn mor ar riye
“Li fou, ki li gagne?”
Li retourne, li asize…li mazine
Ki sa rasinn-la resanble?
Li reflesi, li kree
Landime, li re-branse
Direksion santie
Bann-la finn soke
“E zot…Gete !!!”
“So lizie, so nene, Nelson Mandela sa”
“To’nn fer Nelson Mandela!!!”
Zot tou ti anvi so rasinn
Li refize
Ant li ek sa rasinn-la
enn koneksion ti’nn kree
Brans apre brans
Enn nouvo lavi
Brans apre brans
Enn nouvo souf
Setaki vini, propoze
“Misie. Vinn lotel. Vinn skilpte.”
Se zour li ariv lepor
So gouz dan so pos
Enn bout dibwa dan so lame
Zour apre zour, li revini, li kontignie
Ti bolom dibwa monte
Zot finn kontan li, li finn kontan zot
Li’nn reste
Zordi, 25-an apre, mo la, devan li
Mo ti anvi konn so lavi, so zistwar
Li, li la
Li riye, li partaze, li imazine
“Asize, mo pou rakont twa.”
“Ki ou pou rakont mwa?”
“Mo pou rakont twa l’histoire
de L’homme qui est passé.”